کدخبر : 35427
جمعه ۶ مرداد ۱۳۹۶ - ۱۴:۴۳
فاقددیدگاه
یولوموزو تاپمالییق...

بیر “تورک” آدلی صحیفه نین سانال دونیاسین دا اساس هدفی نه اولمالی دیر؟!

دورنانیوز - تورکجه سئرویسی: :بو گونلرده سانال(مجازی) دونیاسین دا چوخلو صحیفه لر ، میللیت چی لیک و اوست اوسته "تورک" مسئله سی ایله باغلی اولان قونولاردا آچیلاراق ، هر بیری سی چالیشیرلار کی اؤز قایدالاریندا ، بیرمئساژی صحیفه لری نین موخاطب لرینه آنلادیب و اونلارین دیققتینی جلب ائده لر .

دورنانیوز – اورمولو-م :بو گونلرده سانال(مجازی) دونیاسین دا چوخلو صحیفه لر ، میللیت چی لیک و اوست اوسته “تورک” مسئله سی ایله باغلی اولان قونولاردا آچیلاراق ، هر بیری سی چالیشیرلار کی اؤز قایدالاریندا ، بیرمئساژی صحیفه لری نین موخاطب لرینه آنلادیب و اونلارین دیققتینی جلب ائده لر .
میللیت چی صحیفه لرین سایی نین چوخالماغی ایلک باخیش دا چوخ خوشا گلن و گؤزل نظره گلیر آمما دیققت له باخاندا ، گؤرونور کی تأسوف له اونلارین چوخونون کیفیتی آشاغی و محتواسیز دیر.
اصلینده ،بو سایاق صحیفه لرین دولاندیران لاری(ادمین لری) ایکی اؤنملی مسئله دن غافیل اولوب لار . اونلارین بیری صحیفه نین “آماجی” (هدفی) و اوبیری سی “بو آماج لارا چاتماق واسیطه سی(ابزاری) ” دیر.
آیدین وبللی دیر کی بیر “تورک” آدلی صحیفه نین اساس هدفی گره ک “تورک دیلی” و اونون “کولتور” ، “گئچمیش” ، و “مدنیتی” نی دوزگون و دوغرو شکیلده ، اؤنجه بیلمه ین تورک لره و سونرا دا آیری دیل و سوی(نژاد) دا اولان اینسان لارا تانیتدیرماق اولوب و بو هدفه چاتماق یولوندا دوز ، ساغلام و گئرچک ابزارلاردان فایدالانالار.
تأسوف له بعضی میللیت چی صحیفه لر ، اؤز هدف لری و اونا چاتماق یولونو ایتیریب ، دوز یولدان آزیب و نهایت ده ، اونلارین چالیشمالاری آذربایجانین حالینا هئچ قازانجی اولمویوب بلکه ده ایفراط درجه ده توند ، آجیق لی و عصبی داورانیش لار و مطلب لرله،تکجه مخالف تنقید چی لر و آیری دیل ده دانیشان لارا ایهانت،سایغی سیزلیق و ادب سیزلیک ائلییب ،بیلر بیلمز، آذربایجان خالقینین اوستون دوشونجه سینی اؤزگه لرین باخیشیندا تخریب ائدیرلر.
بو صحیفه لر کؤهنلمیش(کلیشه لی)،حاشیه لی و گاهدان یالان و تحریک ائدیجی و ایفراط لا دولو مطلب و شکیل لر له تکجه لایک قازانماق و فالوئر چوخالتماق فیکرینده اولوب و بو یول دا هئچ چیرکین ایش دن اسیرگه مه ییب و لازیم گلدیک ده گئنج فالوئرلرین دورو و تمیز دویغو و احساس لاریندان سوء استفاده ائلییب و اونلاری بیلمه دن اؤز شوبهه لی نیت لری ایله یول بیر ائدیرلر.
گاهدان گؤرونور کی بعضی نئچه مین لیک تورک آدلی ایفراطی صحیفه لرین ادمین لری ، ایکی خط تورکجه یازیب اوخوماق دان عاجیز قالیب و تورک تاریخیندن هئچ بیر زاد بیلمه ییب ، اؤز یارادیجی(تولیدی) مطلب لرین یئرینه تکجه هنرلری آیری لاردان پست اوغورلاماق و کپی پئیست ائله ماق دیر.
سورغو بودور کی بئلنچی صحیفه لرین آذربایجانا ائتدیگی خدمت اونون باشینی آلچاق ائتمک دن سونرا نه اولا بیلر???
بوگون ، آذربایجان ،سانال دونیاسین دا ،هر شئی دن چوخ ادعاسیز،ساوادلی،میننت سیز چالیشان،مدنی و معتدل دوشونجه لی و مؤلف اینسان لارا محتاج دیر.
بئلنچی اینسان لارین چالیشماسی بونا سبب اولار کی یالان دوغرودان،یانلیش دوزدن و یاخجی پیس دن راحاتلیق لا تورک لر و اؤزگه لرین فیکرینده سئچیلیب و آذربایجانین موحتشم و ایفتخارلی صنعت ، کولتور و تاریخی دونیایا یاییلا.
سؤزون قیساسی ، بو چالیشمالارین بوتونو ، او زامان یارارلی و فایدالی اولا بیلر کی اونون اثرینده تورک خالقی اؤز آنا دیلینه ماراق گؤستریب و اونلا یازیب اوخوماق و دوز دانیشماغی اؤیرنه،تورک تاریخینی اوخویوب ، تورک موسیقی سینه قولاق وئریب ، تورک آدلاری دیریلدیب و باریش لا اؤزگورلوک دوشونجه سینی گله جک نسیل لره تاپشیرا.
سونون دا ، بوتون سانال دونیاسیندا چالیشان تورک باجی قارداشلاریما(اؤزل لیک له اؤزومه) بو قونو دا دوشونمک و دوز یولون تاپماغینا اؤنری وئریرم.

یاشاسین دونیانین هر یئرینده یاشایان دوشونجه لی اینسان لار !

اورمولو_م

1+
امتیاز:
اشتراک گذاری:
مطالب مرتبط
دیدگاه شما