کدخبر : 32647
یکشنبه ۷ شهریور ۱۳۹۵ - ۲۲:۵۷
فاقددیدگاه
قیسا حیکایه:

کد‌ر یئلی

کیوسک
دورنانیوز - تورکجه سئرویسی : كوچه‌نين باشيندا يئرلشن بير تئلئفون كؤشكونون [کيوسک] قاباغيندا جاماعات صف باغلاييب. هاوا سويوق‌دور. ياغيش ياغير. دؤزومسوز آدام‌لار گؤزلريني كؤشكون ايچينه زيلله‌ييب‌لر.

دورنانیوز – قیسا حیکایه : کوٍچه‌نین باشیندا یئرلشن بیر تئلئفون کؤشکوٍنون [کیوسک] قاباغیندا جاماعات صف باغلاییب. هاوا سوْیوق‌دور. یاغیش یاغیر. دؤزوٍم‌سوٍز آدام‌لار گؤزلرینی کؤشکوٍن ایچینه زیلله‌ییب‌لر. دسته‌یی ألینه آلمیش کیشی، تئلئفونلا دانیشیر. توْختاق‌دیر، کیمسه‌نی وئجینه آلمیر. گوٍلور، اوغونوب کئچیر. بیر گیله سیگارئت چیخاریر، آلیشدیریب یئنه ده دانیشیغا قیزیشیر. ائشیکده‌کی آدام‌لار تله‌سیرلر، سینیرلری گرگین‌دیر. دئیینیرلر. صبری توٍکنمیش بیریسی سیرادان چیخاراق کوٍچه‌دن کئچیب، گئجه‌نین قارانلیغیندا ایتیر. بیرـ ‌ایکی تله‌سگَن آدام ‌دا سیرادان چیخماغی دوٍشونور، سوْنرا نه‌ایسه فیکیر‌لریندن داشینیرلار. سیرانین باشیندا دورموش کیشی کؤشکوٍن قاپیسینی دؤیوٍر. کؤشکده‌کی آدام قاش‌ـ قاباغینی ساللایاراق تلسمه‌مه‌لرینی آنلادیر. هامی‌نین اعتیراض سسی اوجالیر. آمما کؤشکده‌کی کیشی تئزـ تئز دانیشیر. گوٍله‌ـ‌ گوٍله دسته‌یی قوْیور. تئلئفون دفترینی گؤتوٍروب، کؤشکدن چیخیر. سئوینجیندن دریسینه سیغمیر. جاماعات آجیقلی باخیش‌لارلا اوْنو سوٍزور، آستاجا سؤیوٍرلر. اوْ ایسه سایماز آددیم‌لارلا قارانلیقدا ایتیر.

ایکینجی نفر تئلئفون کؤشکوٍنه گیریر. یامان آجیقلانیب. دسته‌یی قالدیرارکن گؤزوٍ ایندیجه قارانلیقدا ایتمیش آدامین کؤلگه‌سینی آختاریر. تئلئفون دفترینی چیخاریب، واراقلاییر. بیر سکّه سالیر، نؤمره‌لری ییغیر. دانیشماغا باشلادیقدا سیرـ صیفتی آچیلیر. کراواتی‌نین دوٍیونونو بوْشالدیر. دانیشیر، دانیشیر، یئنه ‌ده دانیشیر. أییلیر، دوٍزه لیر. اوْ بیری آدام شوٍشه‌نی دؤیوٍر. کؤشکوٍن ایچینده‌کی کیشی اوْنو سایمیر. دیشارداکی کیشی یئنه ‌ده شوٍشه‌نی دؤیوٍر. ایچه‌ریده‌کی کیشی اوٍزونو تورشودوب، دؤزوٍملو اوْلمالارینا ایشاره ائدیر. یئنه‌ ده دانیشیر، اوٍره‌کدن گوٍلور. دسته‌یی قوْیور. کاغیذ‌ـ کوغوذونو ییغیشدیریر، کراواتی‌نین دوٍیونونو برکیدیب، کؤشکدن چیخیر. هامی نیفرت‌له اوْنا باخیر. او دا کیمسه‌نی سایمادان یوْل آلیر، قارانلیقدا ایتیر.

سونراکی آدام کؤشکه گیره‌رـ ‌گیرمز آجیقلا قاپینی باغلاییر. چاشقین‌دیر، آجیغیندان یئره توٍپورور. دسته‌یی قالدیریر، بیر سکّه سالیر. دانیشیر، تپیک‌لرینی یئره دؤیه ـ دؤیه دانیشیر. نهایت توْختاییب، گوٍلومسه‌ییر. گؤزله‌مکده اوْلان دؤزوٍم سوٍز آدام لار أل‌لرینی أل‌لرینه، هردن ده دیزلرینه دؤیوٍرلر. بیر نئچه سی سیرادان چیخیب، قارانلیقدا گؤزدن ایتیرلر. ایچه‌ریده‌کی کیشی کؤشکدن چیخیر. گه‌ییریر، سوْنرا ماشینینا اوْتوروب، تله سیک اوزاقلاشیر.

بیر آرواد، قوْلتوغوندا چه‌لییی، کؤشکه گیریر. بیر آز دوروب نفسینی دریر. دسته‌یی قالدیریر. سکّه سالیب، باشلاییر دانیشماغا. نه‌سه سوْروشور، تعجب‌له‌نیر. چوْخ اینجیک گؤرونور. ائشیتمیر، باشا دوٍشمور. دانیشیر، یئنه ده دانیشیر. سیرایا دوٍزولموش آدام لار بئزیکیب‌لر. اوْنلاردان آجیقلی بیریسی یومروقلا شوٍشه‌نی دؤیوٍر. قوْجا آرواد محل قوْیمور. دانیشاـ دانیشا اوغونوب، کئچیر. قوْلتوق چوبوق‌لارینی بیر یانا آتیر. کیمسه ایچه‌ری کئچمه‌سین دئیه، آیاغینی قاپی‌یا سؤیکه‌ییر. ائشیکده‌کی‌لر جانا گلمیشلر.

کؤشکه گیره‌ن سوْنراکی آدام اوْن یاشیندا بیر اوشاق‌دیر. دسته‌یی قالدیریر. دانیشیر، دانیشیر. هامی تله‌سیر. [اوشاق کؤشکدن چیخیر] سوْنرا تله‌سگن‌لر بیرـ بیر ایچه‌ری گیریر، دیرچه‌لیر، باییرداکی آدام‌لارا اعتنا ائتمه‌دن دانیشیر، دانیشیرلار. دئییر‌سن کؤشک گوٍج مرکزی‌دیر.

سوْنونجو آدام، قوْجا بیر کیشی‌دیر. قیویرـ زیویرلا دوْلو توْربا ألینده ایچه‌ری گیریر. یوْرغون، چاشقین. شوٍشه‌دن چؤله باخیر، کیمسه یوْخدور. یئره سریلیر. اوزانیر کی، یاتسین، یومروق‌لا قاپینی دؤیوٍرلر. یئل‌دیر‌ قاپینی دؤیوٍر.

قوجا کیشی کؤشکدن ائشییه چیخیر. تاختا اوْتوراجاغین اوٍستونه اوزانیر. یئل کؤشکه گیریب، دسته‌یی قالدیریر. یاغیش یومروقلا شوٍشه‌نی دؤیوٍر.

 

 

یازار : غلامحسین ساعدی

1+
امتیاز:
اشتراک گذاری:
مطالب مرتبط
دیدگاه شما